Os parquistas dragarán unha zona portuaria para obter area coa que rexenerar os viveiros

A Agrupación de Parquistas de Carril pretende, dentro da súa aposta pola rexeneración e produtividade dos viveiros, realizar unha nova aportación de area ás concesións, traballos que poderían comezar en setembro, unha vez que actualmente estase na tramitación das solicitudes e permisos necesarios.

Desde o colectivo carrilexo sinálase que a area obteríana eles mesmos a través dun dragado en zona portuaria. “Xa o temos feito máis veces. Con todos os controis necesarios. O certo é que neste sentido desde a Autoridade Portuaria portáronse moi ben cos parquistas”, sinala José Luis Villanueva, presidente da agrupación.

Trataríase, pois, de que nunha “zona de maniobra” da área portuaria, designaríase unha parte para, unha vez retirada a capa superficial de fango, se poida extraer a area. Cómpre lembrar que os áridos da zona do Porto son moi apreciados polo sector do mar arousán, que xa os ten empregados en rexeneracións e postas en valor de bancos marisqueiros en Rianxo, Vilaxoán ou Cambados, entre outros.

Villanueva sinala que esta actuación de aporte dos áridos nos viveiros desenvolverase de xeito paulatino “para evitar que haxa un impacto no medio natural e no propio recurso”.

A isto engade que se efectuarán controis diarios e continuos tanto sobre os traballos de dragado coma do transporte de area.

Os proxectos para a rexeneración dos parques realízanse periódicamente e sempre segundo o estado e necesidades das diferentes áreas de viveiros de cultivos. Condicións meteorolóxicas como as correntes, entre outras, inflúen sobre a area que posúen os parques, de aí que se faga necesario a súa reposición.

 

Proxecto > Por outra parte, os parquistas de Carril siguen mergullados no ambicioso proxecto que teñen deseñado para optimizar a produción e rendemento dos seus viveiros, unha iniciativa presentada xa á Consellería de Mar.

Unha iniciativa que tería unha duración de tres anos e medio, implicando a universidades, administración e o propio sector acuícola carrilexo.

“Non se fixo nada parecido”, afirmaba hai unhas semanas o presidente da Agrupación, José Luis Villanueva, que resalta que o proxecto abarca múltiples vertentes, desde o estudio de posibles patoloxías que poida ter a cría sementada nos viveiros ata a medición e control das correntes e sedimentación dos diferentes parques. Todo elo, e moito máis, cunha finalidade clara: Ter unha completa radiografía de todos os factores que determinan o rendemento dos viveiros de cara a optimizar a produción nos mesmos.

“A posta en marcha deste plan require un importante investimento económico, así como de medios e persoal. Pero é un paso importante na responsabilidade do propio sector na investigación e estudio”, argumenta Villanueva, que sinala que este proxecto tamén se centraría en aspectos coma determinar as causas da mortandade da ameixa (non sempre atribuibles ás riadas) ou a catalogación dos depredadores dos bivalvos. Un dos pasos deste estudo centraríase en estudar as características de cada zona de parques para, en base ás correntes que lles afectan, o sustrato,.., determinar a densidade óptima a sementar en cada zona para ter o mellor rendemento. Nesta liña, os parquistas contemplan no seu estudio a necesidade de ubicar boias para medir diferentes variables, desde a contaminación ata mostraxes semanais de correntes, salinidade...

Fuente: Diario de Arousa